Հատուածներ՝ 13 ապրիլ 1965-ին լոյս տեսած «Միւռոնօրհնութիւն – նախապատրաստական աշխատանքներ» խորագրով յօդուածէն։
Ինչպէս նախապէս ծանուցուած էր կաթողիկոսարանիս դիւանին կողմէ, Ս. աթոռոյս վեհափառ հայրապետը` Խորէն Ա. կաթողիկոս, հանդերձեալ է սրբալոյս միւռոնի օրհնութիւն կատարել, յառաջիկայ 30 մայիս 1965, կիրակի օր:
Միւռոնօրհնութեան նախապատրաստական աշխատանքները սկսած են արդէն վեհափառ հայրապետի անմիջական հսկողութեան ներքեւ եւ յառաջ կը տարուին համաձայն միւռոնօրհնութեան մաշտոցի հրահանգներուն:
Ս. միւռոնի քառասուն տեսակ անուշահոտ ծաղիկները, հունտերը եւ արմատները, չոր վիճակի մէջ, լուրջ աշխատութեամբ դպրեվանքի սարկաւագներուն միջոցով սանդերու մէջ ծեծուեցան ու փոշիի վիճակի վերածուեցան:
Ապրիլ 25-ին, միւռոնօրհնութենէն շուրջ քառասուն օրեր առաջ, պատրաստուած միւռոնի այս նիւթը, կաթողիկոսարանիս շքեղակերտ կաթսային մէջ լեցուած, պիտի դրուի Անթիլիասի մայր տաճարի Աւագ խորանին բեմին ձախակողմը` քողարկուած նրբահիւս շղարշով, ուր պիտի մնայ մինչեւ օրհնութեան թուականը, 30 մայիս:
Միւռոնօրհնութեան կաթսան անգնահատելի նուէրն է մեծահռչակ Տիւզեան գերդաստանի եւ բարեհամբաւ ու բազմավաստակ Յարութիւն Ամիրա Պէզճեանի կողմէ` Կիլիկիոյ կաթողիկոսութեան: Արծաթեայ փորագրական արուեստի գլուխ գործոց մըն է ան:
ՍՈՒՐԷՆ ՎՐԴ. ՔԱԹԱՐՈՅԵԱՆ

Leave a comment